٦ إضطرابات نفسية ممكن تكون عندك ومش عارف
طبعا كلنا متفقين إن الإضطرابات النفسية بتحصل نتيجة خلل فى مراكز المخ، والكيمياء والهرمونات، واللى فى الآخر بتسبب أنماط لتصرف مش مفهوم، ومشاكل نفسية.
دى قائمة ببعض الأمراض المنتشرة بين الناس ومحدش بيديها أى أهمية.
١- - Alexithymiaلامفرادتية
اللامفرادتية عبارة عن إضطراب نفسى بيظهر فـى صورة العجز عن التعبير بصورة لفظية، عن المشاعر، والأحاسيس الخاصة بالشخص نفسه، أو تجاه اللى حواليه. الكلمة أصلها إغريقى وتعنى بالحرف: no words for emotions-مفيش كلام لوصف المشاعر.
الشخص ده دايما بيتوصف إنه بارد، وتقيل، وعديم الإحساس، وتِلم. وده يرجع لأن البنى أدم نفسه قدرته على التخيل والحلم ضئيلة جدا. وبيميل للحقائق والمعلومات ويتجاهل أى مشاعر متعلقة بالموضوع. دايما عنده عجز عن التعاطف وإظهار المشاعر، وبيبقى صعب عليه إنه يتفهم ويتجاوب مع مشاعر الناس.
الناس دى معروف إنها بتكتم، ومش بتعرف تعبر عن نفسها. ومش بيقدروا حتى يعبروا عن التوتر، والضغط اللى بيمروا بيه. فدايما جسمهم بيقوم بالمهمة دى وبيظهر فى شكل أمراض جسدية، زى آلام المفاصل، والقرح المعوية.
اللامفرادتية لها نوعين: مؤقت ومتوارث، المؤقت ده بيحصل نتيجة حاجة زى مثلا تعرض البنى آدم ده لصدمة بسبب موقف صعب. والنوع التانى بيتولد الإنسان بيه، أو تعرضه لظروف زى الإهمال أو العنف من اللى بيرعاه.
٢- Onychophagia - قضم الأظافر
قطم الضوافر يعتبر جزء من اضطراب الوسواس القهرى. المصابين بيبقى عندهم رغبة مُلحة لقطم ضوافرهم. وهم فعلا بيحسوا بالألم اللى بيسببوه لنفسهم. بس التصرف ده بيقف لما ما بيبقوش متوترين أو مضغوطين. درجة الضرر بتختلف من واحد لواحد، بس هم بيؤذوا ضوافرهم وجلدهم لدرجة النزيف فى بعض الأحيان. الحالة دى منتشرة جدا بين الأطفال والمراهقين.
٣- Misophonia - الحساسية المفرطة للأصوات
عبارة عن حساسية شديدة اتجاه أصوات معينة. الأصوات دى بتبقى فى الغالب أصوات بتطلع عن طريق الفم. يعنى مثلا حد بيمضغ لبان، أو بياكل فشار بصوت عالى، أو حد بيتنفس أو بيتاوب. أو ممكن تكون فى صورة أصوات صغيرة متكررة، زى شخللة المفتاح، أو هز الرجلين.
اللى عنده الاضطراب ده بيحس بالتوتر، وعدم الإرياحية، وبيبقى عايز يقوم ويسيب القعدة. بيتنرفز كتير، وساعات بيحس بإشمئزاز من سماع الأصوات دى. للأسف الاضطراب غير مفهوم وأحيانا تافهه بالنسبة للناس اللى حوالين المصاب، وعادة بيهاجموه بشراسة لأنهم بيفتكروا إن ده تقليل احترام لهم. بس المصاب ده بيدمر حياة المريض الإجتماعية، وممكن توصل بيه إنه يتفادى مناسبات أو تجمعات معينة، أو يرفض يروح للمطاعم أو يضطر ياكل لوحده بعيد عن أهله، زوجه/زوجته.
٤- Shy bladder - المثانة الخجولة
المثانة الخجولة ده اضطراب والله مش هزار! بيصيب الناس فعلا بسبب عجزه إنه يتبول فى وجود الآخرين، يعنى مش بـ يقدر يعمل بيبى فى الحمامات العامة، أو فى بيوت الناس، أو حتى فى بيته لو فيه ضيوف!
المصاب مش بيقدر يحس بالخصوصية، وبالتالى بسبب التأثير النفسى عضلة المثانة بتقفل ومش بتخليه يقدر يتبول طبيعى. وطبعا المرض ده بيعيقه إجتماعيا، وبيخليه يتجنب أى أماكن عامة، أو حفلات، أو حتى إنه يخرج مع الناس اللى بيحبها. ده غير أمراض إلتهاب المثانة بسبب زنقته الطويلة.
٥- Oppositional Defiant Disorder - اضطراب المعارض المتحدى
على قد ما اسمه شبه أسماء المصارعين فى سپيس تون، بس الاضطراب ده بيخلى البنى آدم على طول معترض وثائر، وعاصى على أى إنسان فى موقع سلطة. يعنى مثلا المرض ده بيبتدى مع الأطفال والمراهقين، بيثوروا وبيعصوا وبيضايقوا أهاليهم، أو المدرسيين بتوعهم، لإنهم بيمثلوا لهم السلطة. وعند الكبار ممكن تلاقى واحد فى الشغل على طول معترض، وغير متعاون مع حد، وثائر ومش بيمشى على قوانين الشركة وكلام المدير. أعراض المرض ده بتاخد أشكال مختلفة: نوبات غضب، مقاوحة ومجادلة مستمرة، مش عايز يتعاون، بيحاول إنه يزعج الناس بكل الطرق الممكنة، على طول عايز ينتقم، وبيستخدم لغة قاسية وألفاظ بذيئة فى التعامل.
٦- Involuntary expression disorder - اضطراب التعبير الغير تطوعى
عمرك شفت حد قاعد فى عزاء ومسخسخ على روحه من الضحك لوحده؟ هو مش قليل الذوق ولا حاجة، أو لقى حاجة تضحكه فى الموقف ده. بس يمكن هو مش قادر يتحكم فى مشاعره وأحاسيسه اتجاه الموقف ده، بمعنى إنه ممكن ييجى له نوبة عياط فى فرح أو ضحك هيستيرى فى موقف مأساوى، أو غضب وعصبية وهو بيتعامل مع موقف مالهوش أى علاقة بالمشاعر اللى بيظهرها. المصابين على طول بيحسوا بالذنب، والإحراج، والغربة، بسبب تصرفاتهم اللى بيساء فهمها، وبيمنعهم إنهم يمارسوا حياتهم الإجتماعية بشكل طبيعى.
المصادر
مصدر Thumbnail:
ليست هناك تعليقات:
إرسال تعليق