هوجة الاكتئاب الموسمي بدأت.. اعرف إنت بتعاني منه ولا لأ
Published date: 18/10/2018
في فصل الخريف والشتاء بتقل ساعات النهار والليل بيبقى أطول وغالبا النوم والكسل بيبقوا مسيطرين على كل الناس، وده بيخلق نوع من أنواع الاكتئاب اللي اسمه الاكتئاب الموسمي وهو تقريبا اكتئاب بيكون جاي من قلة التعرض للضوء وتحول السما للون الرمادي بسبب الغيوم واللي بيُعتقد إنه بيسبب اختلال في التوازن الكيميائي في الدماغ، الاكتئاب الموسمي هو الاكتئاب اللي بيبتدي وينتهي تقريبا كل سنة في نفس الوقت من كل سنة، قليل جدا لما بيكون فيه اكتئاب موسمي في الصيف أو الربيع.
وبيعتبر الاكتئاب الموسمي من أشد أنواع الاكتئاب ومن أعراضه:
1- الشعور باليأس
2- فقدان الطاقة
3- صعوبة التركيز
4- مشاكل النوم والشهية
5- التفكير في الانتحار
لكن فيه أعراض بتخص الاكتئاب الموسمي اللي بيكون في الشتاء زي:
1- مابتقدرش تقعد مع الناس لفترة طويلة
2- حساسية من النقد
3- النوم لفترات طويلة
4- زيادة الشهية بطريقة توصل لزيادة الوزن
5- الإحساس بتقل في الإيد والرجل
من طرق العلاج من الاكتئاب الموسمي:
1- التعرض للضوء: من طرق العلاج للاكتئاب الموسمي في الشتاء هو التعرض للضوء عشان بيعوض أشعة الشمس الطبيعية، واللي اتضح إنها بتسبب تغير في المواد الكيمائية اللي بيفرزها المخ اللي بتأثر على الحالة المزاجية.
2- العلاج النفسي أو العلاج الدوائي: لو هتتعرض لأي نوع من أنواع العلاج الدوائي يا ريت تسأل دكتور الأول، وممكن تاخد خطوة في العلاج النفسي أو اللي بيسمى بالعلاج الكلامي لإنه هيساعدك تتعرف على أفكارك وسلوكياتك السلبية وتتجنبها، وهيخليك تتخطى فترة الاكتئاب بدون خساير كبيرة يعني.
ليست هناك تعليقات:
إرسال تعليق